मधेसी मोर्चाको सभा चुरेभावरले बिथोल्यो, २३ जना घाइते, गाडीमा आगजनी

भिडियो हेर्न यहाँ क्लिक गर्नुहोस

सर्लाही, मंसिर १७ । चुरेभावर पार्टीले सर्लाहीमा विहीबार मधेसी मार्चाको विरोधसभा बिथोलिदिएको छ ।

पूर्व पश्चिम राजमार्गअन्तर्गत् सर्लाहीको नवलपुरमा दिउँसो मधेसी मोर्चाले विरोधसभा गर्न लागेकोमा चुरेभावरका कार्यकर्ताले बिथोलिदिएका हुन् ।


त्यसपछि मधेसी मोर्चाका कार्यकर्ताले नवलपुरमा टायर बालेर प्रदर्शन गरेका थिए । उक्तक्रममा दुबै पक्षका कार्यकर्ताबीच झडपसमेत भएको थियो । तनावको स्थिति आएपछि प्रहरीले बल प्रयोग गरेको थियो ।

त्यसक्रममा प्रहरीले ३५ राउन्ड हवाई फायर, ५४ राउन्ड अश्रुग्यास र २७ राउन्ड रबरको गोली चलाएर मधेसी मोर्चा र चुरेभावरका कार्यकर्तालाई हटाएको जनाइएको छ ।

प्रहरीले चलाएको गोलीको छर्रा लागेर मधेसी मोर्चाका ७ जना तथा चुरेभावरका ११ जना कार्यकर्ता घाइते भएका छन् । स्थितिलाई नियन्त्रणमा लिन खोज्दा ५ जना प्रहरीसमेत घाइते भएका छन् ।

सभा गर्न नसकेपछि मोर्चाका केन्द्रीयस्तरका नेताहरु नवलपुर आउन नपाएको बताइएको छ ।

यसैबीच, आक्रोशित मधेसी मोर्चाका कार्यकर्ताले आन्दोलनको अनुगमन गर्न आएको राष्ट्रिय मानवअधिकार आयोगको बा७च ७४७६ नम्बरको गाडीमासमेत आगजनी गरेका छन् ।

आगजनीबाट गाडी पूर्णरुपमा जलेको सर्लाहीका प्रहरी प्रवक्ता डीएसपी रमेशकुमार खड्काले जानकारी दिए ।

यता, चुरेभावरका कार्यकर्ताले पनि लालबन्दी बजारमा दुईओटा भारतीय नम्बर प्लेटका मोटरसाइकल र बागवानी जंगलमा नेपाली नम्बर प्लेट भएको एउटा मोटरसाइकलमा आगजनी गरेका छन् ।

मधेसी मोर्चाले जुटपानी स्कुलमा गर्ने भनेको कार्यक्रम फेरि नवलपुर चोकमा गर्न खोजेपछि झडपको अवस्था सिर्जना भएको हो ।

विरोधसभामा मोर्चाका शीर्ष नेताले सम्बोधन गर्ने कार्यक्रम रहेको थियो ।

Labels: समाचार