युरोकप उपाधि पोर्चुगलले जितोस्

भिडियो हेर्न यहाँ क्लिक गर्नुहोस

राजुकाजी शाक्य
युरोकपको स्तर यसपटक धेरै माथि पुगेको छ । टोलीको गेम प्लान र खेल्ने शैलीमा विगतभन्दा धेरै परिवर्तन भएको देखिन्छ ।

खेलाडीको फिजिकल फिटनेस र काउन्टर प्रहारमा गोल गर्ने क्षमतामा समेत धेरै परिवर्तन भएको छ । नकआउट चरणमा नसोचेका टोलीले हार ब्यहोरे। अगाडिको खेल हेर्दा जर्मनीले जित्ला भन्ने लाग्थ्यो । तर, फ्रान्ससँग जर्मनीले राम्रो खेले पनि गोल गर्न सकेन ।

फुटबलको आँखा हुँदैन । जसले बढी गोल गर्‍यो त्यही टोलीले जित्ने भएकाले नतिजा कहिलेकाहीँ नसोचेको टोलीमा जान्छ ।

पोर्चुगल समूहगत चरणका सबै खेलेर बराबरी खेलेर पनि फाइनलसम्म आइपुगेको छ । भाग्यले पनि उसलाई साथ दिएको हो कि जस्तो लाग्छ । फाइनलमा जित्यो भने पनि आश्चर्य हुनेछैन ।

युरोकप पोर्चुगलले जिते त्यो विषेष हुने छ । क्रिस्टियानो रोनाल्डोजस्ता खेलाडीको टोलीले एकपटक युरोकप जितेमा झनै उत्साह बढ्ने देखिन्छ । विश्वले मन पराएको खेलाडीको टोलीले ठूलो उपाधि जित्नु राम्रो पनि हो। पोर्चुगल सामान्य खेल प्रदर्शन गर्दै अगाडि बढिरहेको छ ।

मैले यसपटक पोर्चुगलको नै समर्थन गरेको छु । रोनाल्डोको खेल्ने तरिका मलाई धेरै मन पर्छ । पोर्चुगलमा राम्रा र अनुभवी खेलाडी छन् । रक्षापंक्ति, मध्यपंक्ति र अग्रपंक्तिमा पनि पोर्चुगल राम्रै छ ।

रोनाल्डोले देशका लागि आफूलाई प्रमाणित गरेर देखाउने बेला आएको छ । पोर्चुगललाई उपाधि दिलाउन सके भने उनको उचाइ थप चुलिनेछ ।

आयोजकको हिसाबले मात्र होइन फाइनलमा फ्रान्स धेरै राम्रो टोली हो । घरेलु मैदान र दर्शकको समर्थन उसको दोस्रो हतियार हो । खेलका हिसाबले फ्रान्स धेरै राम्रो देखिएको छ ।

डिफेन्सिभ र काउन्टर प्रहार उसको धेरै राम्रो छ । जर्मनजस्तो बलियो टोलीलाई पन्छाएर फाइनलमा पुगेको फ्रान्स पोर्चुगलको तुलनामा धेरै राम्रो छ । एक प्रकारले भन्ने हो भने फ्रान्सको पल्लाभारी नै देखिन्छ । तर, मैले अगाडि नै भनेँ, फुटबलको आँखा हुन्न । नतिजा जसको पक्षमा पनि जाने हुँदा फाइनल खेल दुवैका लागि ५०÷५० को अवस्थामा छ ।(शाक्य राष्ट्रिय टोलीका प्रशिक्षक हुन् ।)

Labels: खेलकुद