बिहेमा हिडेका आफन्त चढेको बस दुर्घटना एकको मृत्यु, नौ घाइते

भिडियो हेर्न यहाँ क्लिक गर्नुहोस

पर्वतः पर्वत जिल्लाको त्रिवेणी गाविसमा छोरीको बिहेमा सहभागी हुन जान लागेका आफन्त चढेको बस दुर्घटना हुँदा दक्षिण पर्वतको हुवास–९ करादीमा मंगलबार एक जनाको घटनास्थलमै मृत्यु भएको छ।

दुर्घटनामा परी नौ जना घाइते भएका छन् जसमध्ये तिनको अवस्था गम्भीर रहेको छ ।


दुर्घटनामा परी स्याङ्जाको कालिकाकोट–९ की ५५ वर्षीया कृष्णकुमारी खाम्जाको घटनास्थलमा नै ज्यान गएको छ ।

स्याङ्जाको कालिकाकोट गाविसदेखि दक्षिण पर्वतको त्रिवेणी गाविसतर्फ जाँदै गरेको ग १ ज २४८५ नम्बरको बस दुर्घटनामा परेको हो ।

साँघुरो सडकको घुम्तीमा मोड्ने क्रममा सडकभन्दा ४० मिटर तल मकैबारीमा बस खसेको थियो । दुर्घटनामा परी गम्भीर घाइते भएकालाई उपचारका लागि स्याङ्जाको वालिङतर्फ लगिएको इलाका प्रहरी कार्यालय हुवासका प्रमुख प्रहरी निरीक्षक खगेन्द्र खड्काले जानकारी दिए ।

घाइते भएका कुमार खाम्जा, चोकमाया खाम्जा र पूर्णकला खाम्जाको अवस्था गम्भीर रहेको छ । अन्यको अवस्था भने सामान्य रहेको र उनीहरुको हुवास स्वास्थ्य चौकीमा उपचार भइरहेको प्रहरी निरीक्षक खड्काले जानकारी दिए ।

घाइते हुनेहरु सवै कालिकाकोट–९ का रहेका छन् । बसका चालक कुमबहादुर खाम्जा प्रहरीको नियन्त्रणमा रहेका छन् । रासस 

Labels: वेबसाइटबाट, समाचार