दशैंअघि काठमाडौंमा केवलकार चल्ने (फोटो र भिडियोसहित) धमाधम बन्दैछ चन्द्रागिरीमा केवलकार

भिडियो हेर्न यहाँ क्लिक गर्नुहोस

केवलकारको टावर । थानकोटदेखि चन्द्रागिरीसम्म यस्ता टावर ११ वटा निर्माण गरिने छ ।
नविन अर्याल
८ चैत, काठमाडौं । शहरबाट नजिकै घुम्ने र मनोरञ्जन लिने उपयुक्त गन्तव्यको अभाव खेपिरहेका लाखौं राजधानीबासीले छिट्टै मनोरञ्जनको नयाँ गन्तब्य पाउनेछन् । मुख्य शहरबाट केही किलोमिटरको दुरीमा रहेको थानकोटबाट केवलकार चढेर चन्द्रागिरी पुगी आनन्द लिन अब केही महिनामात्र कुरे पुग्छ ।
दशैंसम्म सञ्चालनमा ल्याइसक्ने लक्ष्य राखिएको केवलकार निर्माण अहिले ६५ प्रतिशत सम्पन्न भइसकेको छ ।
चन्द्रागिरी डाँडालाई थानकोटबाट केवलकार मार्फत जोडेर मुलुककै नुमना पार्कका रुपमा विकास गर्न लागिएको छ । गोदामचौरबाट चन्द्रगिरीसम्म केवलकारको दुरी साढे दुई किलोमिटर रहनेछ । जहाँ केवलकारबाट ८ मिनेटमै पुगिन्छ ।
काठमाडौं फनपार्क प्रालिले चन्द्रागिरी डाँडाको ७ सय २० रोपनी जग्गा ४० वर्षका लागि सरकारसँग भाडामा लिएर मेगा परियोजना निर्माण गर्न लागेको हो । केबलकारको बटम स्टेशन गोदामचौरमा भने ५५ करोड रुपैयाँमा सय रोपनी जग्गा खरिद गरिएको छ ।

चन्द्रागिरी केबलकारको निर्माणाधिन टप स्टेशन
जहाँ बच्चादेखि बुढाबुढीसम्म रमाउन मिल्ने थिम (मनोरञ्जन) पार्क, सपिङ सेन्टर, रेष्टुरेन्ट, बोटानिकल गार्डेन, फोरडी थियटर, भ्यू टावर, पाँचतारे स्तरको लक्जरी होटल, जीप फ्लायर, गल्फ कार्ट लगायतका सविधाहरु उपलब्ध हुनेछन् ।
केवलकार सहित पुरै परियोजना सम्पन्न हुँदा साढे तीन अर्ब रुपैयाँ लगानी हुने परियोजनाका प्रबन्धक दिलिप श्रेष्ठले जानकारी दिए । राजधानीबासी लगायत विदेशी पर्यटकलाई चन्द्रागिरी प्रमुख गन्तव्य बन्ने उनको विश्वास छ ।
अहिले बटम स्टेशन र टप स्टेशनमा केवलकारको भवन तथा टावरहरु निर्माण कार्य तिब्र गतिमा भइरहेको छ । सँगसँगै डाँडामा इच्छेश्वर महादेवको मन्दिर र दृश्यावलकोनका लागि भ्यू टावर पनि निर्माण भइरहेको छ ।
‘गोदाम चौरमा भवन निर्माण ९० प्रतिशत सकियो, चन्द्रागिरी भवनको काम ५० प्रतिशत सकिएको छ’ प्रबन्धक श्रेष्ठले भने- ‘सँगसँगै केवलकारका टावरहरुको निर्माण कार्य पनि भइरहेको छ ।’
थानकोटदेखि चन्द्रागिरीसम्म ११ वटा टावर (पोल) निर्माण गरिने छ । टावरको फाउन्डेसन निर्माण कार्य करिव ७० प्रतिशत सकिएको इञ्जिनियर हरिदेव तामाङले बताए ।

चन्द्रागिरीमा निर्माणाधिन भ्यूटावर (दायाँ) र त्यसको स्केच (बायाँ) ।
राजधानीवासीलाई चन्द्रागिरीसम्म पुर्‍याउन ३८ वटा केवलकार तैनाथ हुनेछन् । एउटा कारमा ८ जनाले यात्रा गर्न सक्ने प्रबन्धक श्रेष्ठले बताए । केवलकारबाट प्रतिघण्टा एक हजार जनासम्म बोक्ने गरी पूर्वाधार निर्माण भइरहेको छ ।
केबलकारका सामाग्रीहरु अष्ट्रिया र सिंगापुरबाट निर्माणस्थलमा ल्याइसकिएको छ । भवन निर्माण सकिने वित्तिकै इक्वीपमेन्टहरु जडान सुरु गरिहाल्ने प्रबन्धक श्रेष्ठले अनलाइनखबरलाई बताए ।
केवलकार यही बैशाखसम्म सञ्चालनमा आइसक्नुपर्ने भएपनि बाटो निर्माण गर्नुपर्दा निर्माणमा ढिलाई हुन पुगेको कन्सल्ट्यान्ट रिसव भण्डारीले बताए । उनका अनुसार चित्लाङ भञ्ज्याङदेखि डाँडासम्म करिव ३.२ किलोमिटर बाटो आफै खनिएको हो ।
यस परियोजनामा आइएमई समूह र भाटभटेनीका संचालक मिनबहादुर गुरुङको संयुक्त लगानी रहेको छ ।


यस्तो हुनेछ चन्द्रागिरी
चन्द्रागिरी डाँडालाई सजिसजाउ र सुबिधायुक्त बनाउने  कम्पनीको लक्ष्य रहेको छ । २४ सय ७५ मिटर उचाई रहेको चन्द्रागिरीमा केवलकारबाट हरियो घना जंगलको अवलोकन गर्दै पुगिने छ ।
केवलकारको टप स्टेशनमा पुग्ने वित्तिकै आँखै अगाडि १६० डिग्रीको कोणमा सेतै हाँसेका हिमालहरु हेर्न पाइनेछ । यहाँबाट काठमाडौं, ललितपुर भक्तपुरका अधिकांश भागहरु देख्न पाइन्छ । आकाश खुलेको बेलामा तराइको केही भू-भागसमेत यहाँबाट देखिन्छ ।
भ्यूटावरमै फोरडी थियटर समेत बनाउन लागिएको छ । जहाँ शैक्षिक सामाग्री, चन्द्रागिरी क्षेत्रमा पाइने वनस्पती, पशुपन्छीदेखि किरा फट्याङ्ग्रासम्मको भिडियो हेर्न पाइनेछ ।
करिव २०/२५ मिनेटको भिडियो एक पटकमा ४० जनासम्मले हेर्न सक्छन् । भ्यू टावर पनि केवलकार सँगसँगै सञ्चालनमा आइसक्ने बताइएको छ ।

परियोजना सम्पन्न भएपछि यस्ताे देखिने छ चन्द्रागिरी डाँडा ।
चन्द्रागिरीको ७२० रोपनी जग्गाभित्रै आकर्षक बोटानिकल गार्डेन बनाइने छ । हरियाली मेन्टेन गर्नका लागि कम्पनीले बायो इञ्जिनियरिङ गर्ने जनाएको छ ।
केवलकारबाट ओर्लिएपछि डाँडामा रहेको इच्छापुरेश्वर महादेवको मन्दिरमा पुगेर दर्शन गर्न सकिन्छ । अहिले यहाँ धमाधम मन्दिर निर्माण भइरहेको छ । जग बसालिसकेको मन्दिर दशैं अगाडि निर्माण गरिसक्ने लक्ष्य रहेको प्रबन्धक श्रेष्ठले बताए ।
मन्दिरको छेवैमा भ्यू टावर निर्माण भइरहेको छ । भ्यू टावरको भुँइतलामा सर्वसाधारणका लागि फुड कोर्ट हुनेछ भने त्यसमाथिको तलामा खर्चालु ग्राहकलाई लक्षित गरी फाइनडाइन रेष्टुरेन्ट हुने छ ।
डाँडाबाट करिव एक किलोमिटर तल पाँचतारे स्तरको रिसोर्ट होटल सञ्चालन गरिने छ । रिसोर्टको डिजाइन भइरहेको जानकारी दिँदै प्रबन्धक श्रेष्ठले २/३ महिना भित्रमा निर्माण सुरु गर्ने जानकारी दिए । भ्यू टावरबाट रिसोर्टसम्म पुग्ने बाटोको दायाँबायाँ फुल लगाएर सुन्दर बनाइने छ ।

इच्छापुरेश्वर महादेवको निर्माणाधिन मन्दिर (दायाँ) र त्यसको स्केच (वायाँ)।
कम्पनीले भ्यू टावरबाट रिसोर्टसम्म जिप फ्लायर बनाउने बताएको छ । करिव ९ सय मिटर दुरी रहने जिप फ्लायरको ल्यान्डिङ स्टेशन रिसोर्टभन्दा केही टाढा हुने छ ।
चन्द्रागिरीको ७२० रोपनी जग्गामा सवारी साधनलाई निषेधित गर्ने बताइएको छ । यहाँ यात्रा गर्नका लागि कम्पनीले इलेक्ट्रिक भेहिकल (गल्फ कार्ट्र)को व्यवस्था गर्ने छ ।
रिसोर्टमा बँगैचाको आनन्द लिँदै हिँडेर जान पनि सकिन्छ, जिप लाइनरबाट पनि जान सकिन्छ, गल्फ कार्टबाट पनि जान सकिन्छ । फर्किदा भने कि त हिँड्नुपर्ने हुन्छ कि त गल्फ कार्ट चढ्नुपर्ने हुन्छ ।
केवलकार नचढी आफ्नो सवारी साधन चढेर जानेहरुले चित्लाङ भञ्ज्याङनेर गाडी रोकेर जानुपर्ने हुन्छ । भञ्ज्याङबाट डाँडासम्म पुग्ने करिव डेढ किलोमिटर सडकको दुबैतिर फुलको बँगैचा बनाइने छ ।
डेढ किलोमिटरको सडक छेऊँछाऊँ बस्नका लागि बेञ्चहरु राखिने र कफि सप खोलिने प्रबन्धक श्रेष्ठले जानकारी दिए । उनका अनुसार चन्द्रागिरीमा एकै पटकमा १० हजार मानिसलाई होल्ड गर्नेगरी ठाउँ निर्माण हुँदैछ ।
यस्तो हुनेछ रिसोर्ट
चन्द्रागिरी डाँडामा बन्ने पाँचतारे स्तरको रिसोर्टको स्केच

खर्चालु पर्यटकलाई लक्षित गर्दै यहाँ पाँचतारे स्तरको रिसोर्ट निर्माण गरिने भएको छ । आगामी दुई वर्षभित्रमा उक्त रिसोर्ट सञ्चालनमा आइसक्ने छ ।
करिव ८० करोड लगानी रहने रिसोर्टमा सयवटा डिलक्स रुमहरु रहने बताइएको छ । रिसोर्टमा दुईवटा स्वीट रुम समेत बनाइने छ । यहाँ रात विताउनका लागि प्रतिरात सय देखि १५० डलरसम्म तिर्नुपर्ने हुन्छ ।
रिसोर्टमा स्वीमिङ पुल, स्पा, ज्याकुजी, सौना, स्टीम वाथ, जीम हाउस, मिनी क्यासिनो लगायतका सबै सुविधाहरु हुने प्रबन्धक श्रेष्ठले जानकारी दिए ।
रिसोर्टमा ४ वटा भवन निर्माण गरिने छ । दुईवटा भवनमा २४/२४ रुमहरु रहनेछन भने दुईवटा भवनमा २६/२६ रुम रहनेछन् । ग्राहकलाई थानकोटबाट केवलकार हुँदै डाँडामा लगिने छ भने त्यहाँबाट जीप फ्लायर वा गल्फ कार्टबाट रिसोर्टमा लगिने छ ।
Chandragiri cable car (10)
टप स्टेशनमा निर्माणाधिन केवलकार टावरको फाउन्डेसन ।
रिसोर्टमा आउने अधिकांश ग्राहकहरु विदेशी हुनेछन् । त्यसको अलवा नेपालका व्यवसायीहरु, उच्चपदस्थ सरकारी अधिकारी, गैरसरकारी संस्थाका कर्मचारी, तथा कर्पोरेट हाउसका बैठक तथा सेमिनारलाई लक्षित गरिएको छ ।
बटम स्टेशन
परियोजनको बटम स्टेशनमा १०० रोपनी जग्गा रहेको छ । सय रोपनी जग्गामध्ये ५० रोपनीमा केवलकारको भवन बनिरहेको छ भने बाँकी ५० रोपनी जग्गामा थिमपार्क (मनोरञ्जन पार्क) निर्माण गरिने बताइएको छ । करिव ५० करोड लगानी रहने पार्कमा बच्चादेखि बुढा बुढीसम्म रमाउन सक्नेछन् ।
भवनको सबैभन्दा तल सर्वसाधारणका लागि फुड कोर्ट हुने छ । त्यसभन्दा माथि खर्चालु ग्राहकलाई लक्षित गर्दै फाइनडाइन रेष्टुरेन्ट खोलिने छ भने त्यसभन्दा माथि ब्रान्डेड शप हुनेछ ।

सबैभन्दा माथिको भागमा केवलकारको संरचना निर्माण गरिने प्रबन्धक श्रेष्ठले जानकारी दिए । दशैंसम्म केवलकार, मन्दिर र भ्यू टावर निर्माण सम्पन्न भइसके पनि सबै संरचना निर्माण भएर पूर्णरुपमा सञ्चालनमा आउन करिव २ वर्ष लाग्ने छ ।
यहाँ आगन्तुकका २ सय कार, ४ सय मोटरसाइकल र सयवटा बस पार्किङ गर्न मिल्ने ठाउँ बनाउने बताइएको छ । यस परियोजनामा सिटिजन्स बैंक इन्टरनेशनलको नेतृत्वमा नेपाल इन्भेष्टमेन्ट बैंक, ग्रान्ड बैंक, सिद्धार्थ बैंक र प्रभु बैंकले कर्जा लगानी गरेका छन् ।

चन्द्रागिरीमा परियोजना निर्माण सम्पन्न भएपछि अाकाशबाट यस्तो देखिने छ ।
इच्छापुरेश्वर महादेवको हाल पूजा हुँदै आएको ठाउँ  । यसको केही माथि डाँडामा अाकर्षक मन्दिर निर्माण भैरहेको छ
इच्छापुरेश्वर महादेवको हाल पूजा हुँदै आएको ठाउँ । यसको केही माथि डाँडामा अाकर्षक मन्दिर निर्माण भैरहेको छ
भिडियो हेर्नुहोस्

Labels: फोटोहरु, विजनेस