'गुगल ब्वाय' आदित्य नेपाल फर्किए

भिडियो हेर्न यहाँ क्लिक गर्नुहोस

काठमाडौं, मंसिर ५ । अद्वितीय क्षमताका कारण ‘गुगल ब्वाय’ भनेर परिचित बनेका नेपाली बालक आदित्य दाहाल अमेरिकामा तीन महिनाको उपचारपछि स्वदेश फर्किएका छन् ।
अमेरिकाको क्यालिफोर्नियास्थित स्टानफोर्ड अस्पतालमा उपचार गराई फर्केका आदित्यको स्वास्थ्यस्थितिमा सामान्य प्रगति भएको उनको परिवारका सदस्यहरुले जनाएका छन् । नेपाल सरकार, अमेरिकास्थित नेपाली दुतावास तथा विभिन्न संघ संस्थाहरुको सहयोगमा आदित्यको गत साउन ११ गतेदेखि अमेरिकामा उपचार भइरहेको थियो ।
आदित्यको शारीरिक दुर्बलतालाई चिकित्सकहरुले एनबीआई डिसअर्डर भएको अनुमान गरेका थिए । हालसम्म भएका परीक्षणहरुबाट प्राप्त रिपोर्ट अनुसार उनको रोग एनबीआइएका १३ प्रकारहरुमा समेत नपरेपछि चिकित्सकहरुले थप अनुसन्धानका लागि स्टानफोर्डका साथैै अमेरिकाका अन्य अस्पताल तथा प्रयोगशालाहरुमा समेत पठाएका छन् ।
सो परीक्षणको रिपोर्ट आउन थप ४–५ महिना लाग्ने भएपछि आदित्यकै आग्रहमा स्वदेश फर्केको उनका अभिभावकको भनार्ई छ ।
यसैबीच, नेपालले अहिले सामना गरिरहेको अप्ठ्यारो अवस्थाबारे आदित्यले लेखेका छन्, ‘खोई त, सहमतिको वातावरण निर्माण गर्ने पक्षमा किन नलागेको ? यसले दुर्घटना निम्त्याउँछ, सहमति बिना केही भन्ने अवस्था देखिनँ ।’

Labels: समाचार