नाराबाजी गर्दागर्दै संसद पेलेरै अगाडि बढेपछि मधेसी मोर्चाले के भन्यो ?

भिडियो हेर्न यहाँ क्लिक गर्नुहोस

अब अन्तिम आन्दोलनको विकल्प छैन्: नेताहरु
काठमाडौं, २९ मंसिर । आजको संसद बैठक जबरजस्ती चलेको भन्दै मधेसकेन्द्रीत दलहरुले आपत्ति जनाएका छन् ।
मधेस आन्दोलनको नेतृत्व गरिरहेको संयुक्त लोकतान्त्रिक मधेसी मोर्चाका ३४ जना सांसदले नाराबाजी र रोष्टम घेराउ गर्दा पनि आजको संसद पेलेरै अगाडि बढेको थियो ।
नाराबाजी र रोष्टम घेर्दा समेत संसदमा जबरजस्ती पूनर्निर्माण विधेयक र संविधान संशोधन विधेयक पेस गरिएको भन्दै मोर्चाले आपत्ति जनाएको हो ।
विधेयक संसदमा दर्ता भएपछि सञ्चारकर्मीलाई सदभावना पार्टीका सहअध्यक्ष लक्ष्मणलाल कर्णले भन्नुभयो– ‘संसारको कुनै पनि संसदीय अभ्यासमा यस्तो बलजफ्ती चल्दैन, हाम्रो संसदमा मंगलबार भयो । सहमतिबाट संविधान संशोधन गर्नुपर्नेमा उहाँहरुले बहुमतको बलमा पेल्न खोज्नुभयो, सरकारसँग जारी वार्तामा अब हामी जाने कि नजाने प्रश्न खडा भएको छ ।’
मोर्चाका अर्का नेता फोरम उपाध्यक्ष लालबाबु राउतले पनि जबरजस्ती गर्दै समस्याको समाधान नहुने बताउनुभयो । उहाँले भन्नुभयो– ‘संसद अवरुद्ध भएको बेला बलको प्रभाव देखाउन खोजियो, पेलेर निकास निस्कदैन भन्ने कुरा उहाँहरुलाई बुझाइदिने कसले ?’
नेताहरुले अब अन्तिम आन्दोलनको विकल्प समेत नरहेको बताएका छन् । मधेसवादी दलका सांसदहरुको नाराबाजीका बीच आजको संसदमा दुईवटा महत्वपूर्ण विधेयक पेस गरिएका छन् ।

Labels: वेबसाइटबाट, समाचार